სამუშაო შეხვედრა თანამშრომლებთან
რეაბილიტაცია-რესოციალიზაციის, არასრულწლოვანთა რეფერირების ცენტრის და მედიაციის მიმართულებით არსებული საჭიროებები განიხილეს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოში გამართულ შეხვედრაზე. უწყების სტრუქტურული ერთეულების ხელმძღვანელებმა თანამშრომლებისგან - სპეციალისტებისგან, პრობაციის ოფიცრებისა და სოციალური მუშაკებისგან, პირადად მოისმინეს არსებული გამოწვევების და საჭიროებების შესახებ ინფორმაცია. ისაუბრეს საკანონმდებლო ცვლილებებსა და მასთან დაკავშირებულ საკითხებზე. განიხილეს ინოვაციური მოწყობილობის - „პრობ-ბოქსის“ გეოგრაფიული ხელმისაწვდომობის გაზრდის მიზნით დაგეგმილი სიახლეები. სამუშაო შეხვედრის მიზანი იყო სისტემაში დაგეგმილი პროექტების ერთობლივი განხილვა და სამომავლო გეგმების განსაზღვრა. მსგავსი ფორმატის შიდაუწყებრივი შეხვედრები გაგრძელდება, ყველა რეგიონს მოიცავს და თანამშრომლების მაქსიმალური ჩართულობით, როგორც პირისპირ, ისე - ონლაინ რეჟიმში წარიმართება. დღეს გამართულ შეხვედრას დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოადგილეები, ზურაბ ბუბუნაური და ერეკლე ჭანტურია, ასევე სტრუქტურული ერთეულების ხელმძღვანელები ესწრებოდნენ.
ახალქალაქში მედიაციის სივრცე გაიხსნა
ახალქალაქში საერთაშორისო სტანდარტების შესაბამისი მედიაციის სივრცე გაიხსნა. ადგილზე მედიაციის პროცესის საჭიროებები სრულად არის გათვალისწინებული. მხარეებისთვის უზრუნველყოფილია კომუნიკაციისა და მოლაპარაკების წარმოების ყველა პირობა. სათანადოდ აღჭურვილ სივრცეში მედიატორებს დაკისრებული მოვალეობის შესრულება გაუმარტივდებათ. ოფისი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ გახსნა. ამ დროისთვის მედიაციის სივრცეები თბილისში, ქუთაისში, ხაშურში, ოზურგეთში და დღეიდან, უკვე ახალქალაქში მოქმედებს; უახლოეს პერიოდში კი, სენაკში, გორში, დედოფლისწყაროში, დმანისში, საჩხერეში, ხობსა და ბათუმში იქნება ხელმისაწვდომი. მედიაცია დამზარალებელსა და დაზარალებულს შორის არსებული კონფლიქტის ამოწურვას ემსახურება. ის აღდგენითი მართლმსაჯულების პრინციპებს ეყრდნობა და ორიენტირებულია დანაშაულის შემხებლობაში მყოფი ყველა პირის ჩართულობაზე, მათი საჭიროებების იდენტიფიცირებასა და საჭიროებების დაკმაყოფილებაზე. 2022 წელს მედიაცია 658 პირის მიმართ იქნა გამოყენებული. წარმატებით დასრულებული მედიაციის მაჩვენებელი 60%-ით განისაზღვრა. დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსი ახალციხის პრობაციის ბიუროში, თანამშრომლებსაც გაესაუბრა, სისტემაში მიმდინარე წლის განმავლობაში დაგეგმილი სიახლეები გააცნო და მათ საჭიროებებზე მიიღო ინფორმაცია.
მულტიუწყებრივი შეხვედრა არასრულწლოვანთა რეფერირების პროცესის ხელშეწყობის მიზნით
სისხლის სამართლის პასუხისმგებლობის ასაკს მიუღწეველ და რთული ქცევის მქონე არასრულწლოვანთა რეფერირების პროცესის ხელშეწყობის მიზნით, მულტიუწყებრივი შეხვედრა შედგა. საჯარო და არასამთავრობო სექტორების წარმომადგენლებმა არასრულწლოვანთა რეფერირების ცენტრის მუშაობის სპეციფიკაზე იმსჯელეს. განიხილეს რეფერირების მექანიზმის არსებული პრაქტიკა და სამომავლო აქტივობები დაგეგმეს. შეხვედრა პროექტ - „ბავშვთა დაცვის სისტემების და მომსახურებების გაძლიერება საქართველოში“ - ფარგლებში შედგა. ის 2021 წლიდან ხორციელდება და სისხლის სამართლის პასუხისმგებლობის ასაკს მიუღწეველ და რთული ქცევის მქონე არასრულწლოვანთა რეფერირების პროცესის ხელშეწყობას ისახავს მიზნად. მულტიუწყებრივ შეხვედრას დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს, მანდატურის სამსახურის, სახელმწიფო ზრუნვის სააგენტოს, შინაგან საქმეთა სამინისტროსა და პროკურატურის წარმომადგენლები ესწრებოდნენ.
არასრულწლოვანთა რეფერირების ცენტრის სპეციალისტებისთვის გზამკვლევი შემუშავდება
არასრულწლოვანთა რეფერირების ცენტრის 7-დან 14 წლამდე ბავშვებთან მომუშავე სპეციალისტებისთვის გზამკვლევი შემუშავდება. ამ მიზნით, ევროპის საბჭოს ნარკომანიასა და ნარკოტიკების უკანონო ბრუნვასთან ბრძოლის თანამშრომლობის ჯგუფის ექსპერტი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს მუშაობას გაეცნო. სამი დღის განმავლობაში კორინა ჯაკომელომ სააგენტოს სტრუქტურული ერთეულების ხელმძღვანელებისგან დეპარტამენტებისა და სპეციალისტების საქმიანობაზე მიიღო ინფორმაცია. გზამკვლევთან ერთად, ექსპერტის ჩართულობით ფსიქო-სოციალური და მენტალური ჯანმრთელობის სირთულეების მქონე ბავშვებთან მომუშავე სპეციალისტებისთვის სახელმძღვანელოც შემუშავდება. საქართველო ევროპის საბჭოს ნარკომანიასა და ნარკოტიკების უკანონო ბრუნვასთან ბრძოლის თანამშრომლობის ჯგუფის (Pompidou Group) წევრი ქვეყანა 2020 წელს გახდა.
წიგნის კითხვის საერთაშორისო დღე
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულმა სააგენტომ წიგნის კითხვის საერთაშორისო დღე ბენეფიციარების თანამედროვე მწერლებთან შეხვედრით აღნიშნა. მოზარდებს მხატვრული ლიტერატურით დაინტერესების პირველი გამოცდილება მწერალმა ბესო ხვედელიძემ გაუზიარა. ისაუბრა პიროვნების ჩამოყალიბების პროცესში წიგნის კითხვის მნიშვნელობაზეც. შეხვედრის დასასრულს ბენეფიციარებს მათი ასაკისა და ინტერესების გათვალისწინებით შერჩეული წიგნები გადაეცათ. შეხვედრა მასწავლებელთა პროფესიული განვითარების ეროვნული ცენტრისა და გამომცემლობა „პალიტრა L”-ის მხარდაჭერით, წიგნის მაღაზიათა ქსელ „ბიბლუსში“ შედგა. წიგნის საჯაროდ კითხვის მსოფლიო დღე კითხვის პოპულარიზაციას ისახავს მიზნად. ის ყოველწლიურად, 2 თებერვალს აღინიშნება და მსოფლიოს 100 ქვეყნიდან 31 მილიონ ადამიანამდე მონაწილეობს.
საახალწლო ღონისძიება არასრულწლოვანი ბენეფიციარებისთვის
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს არასრულწლოვანთა რეფერირების ცენტრმა ბენეფიციარებისთვის საახალწლო ღონისძიება გამართა. ღონისძიების ფარგლებში არასრულწლოვანთა რეფერირების ცენტრის ბენეფიციართა ხელნაკეთი ნივთებისა და ნახატების გამოფენა მოეწყო. შედგა დოკუმენტური ფილმის ჩვენება, რომლის გადაღებაც პროექტ „კინოკლუბის“ ფარგლებში, ბენეფიციარის ჩართულობით განხორციელდა. საღამოზე კიდევ ერთი სურათის პრეზენტაცია გაიმართა, რომელიც მოზარდებმა ანიმაციის რეჟისორ არჩილ კუხიანიძის დახმარებით შექმნეს. ანიმაციაზე მუშაობა ორი თვის განმავლობაში მიმდინარეობდა. არასრულწლოვანთა რეფერირების ცენტრის მხარდამჭერებს იუსტიციის მინისტრის მოადგილემ ბუბა ლომუაშვილმა და დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ დამდეგი ახალი წელი მიულოცეს, ბენეფიციართა რეაბილიტაციის პროცესში შეტანილი წვლილისთვის მადლობა გადაუხადეს და მადლობის სიგელები გადასცეს. მოზარდების საახალწლო განწყობაზე ანიმატორები ზრუნავდნენ. ღონისძიების დასასრულს კი ბენეფიციარებს სასაჩუქრე კალათები გადაეცათ.
ბენეფიციარების ხელნაკეთი ნივთებისა და ნახატების გამოფენა მოეწყო
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ორგანიზებით ბენეფიციარებისთვის საახალწლო ღონისძიება ჩატარდა. საგამოფენო დარბაზი თემატურად - რეგიონების მიხედვით მოეწყო. ამისთვის ბენეფიციარებმა მათი კუთხის სპეციფიკისა და კულტურის გამომხატველი ნაკეთობები შექმნეს. მომზადდა გასტრონომიული სივრცეც, სადაც ქვეყნის სხვადასხვა რეგიონისთვის დამახასიათებელი კერძები იყო წარმოდგენილი. ღონისძიებაზე სააგენტოს წარმომადგენლებმა მსჯავრდებულთა და ყოფილ პატიმართა რესოციალიზაცია-რეაბილიტაციის დეპარტამენტის ბენეფიციარებს დამდეგი ახალი წელი მიულოცეს. შეჯამდა წლის განმავლობაში მიღწეული შედეგებიც. შეხვედრის მიწურულს ბენეფიციარებს სასაჩუქრე კალათები გადაეცათ
სამუშაო შეხვედრა უწყებათაშორისი კონფერენციის ფარგლებში
უწყებათაშორის კონფერენციაზე სარეაბილიტაციო მომსახურებების, პროფესიული და მულტისექტორული თანამშრომლობის გეგმა განისაზღვრა. ორი დღის განმავლობაში მონაწილეებმა ფსიქოლოგებისა და სოციალური მუშაკების მიერ შემთხვევების მართვის შესახებ იმსჯელეს. გაუზიარეს გამოცდილება სამიზნე ჯგუფებთან მუშაობისა და მულტისექტორული თანამშრომლობის გზებზე, რაც პრობაციისა და პენიტენციურ სისტემებს უფრო ეფექტიანს გახდის. მოგვიანებით კი, ფსიქოლოგებისა და სოციალური მუშაკების პანელების მუშაობის შედეგების ერთობლივი პრეზენტაცია გაიმართა. პირველი უწყებათაშორისი კონფერენცია - ფსიქოლოგები და სოციალური მუშაკები რეაბილიტაცია-რესოციალიზაციის პროცესში - წელს პირველად ჩატარდა. ღონისძიება კანონთან კონფლიქტში მყოფი პირების რეაბილიტაცია-რესოციალიზაციის პროცესში ჩართული ფსიქოლოგებისა და სოციალური მუშაკების პროფესიული განვითარების ხელშეწყობას ისახავდა მიზნად. კონფერენცია იუსტიციის სამინისტროს, დანაშაულის პრევენციისა და არასაპატიმრო სასჯელთა აღსრულებისა და პრობაციის ეროვნულ სააგენტოსა და ევროპის საბჭოს ოფისის ორგანიზებით, პროექტის - „ჯანდაცვის უზრუნველყოფის გაუმჯობესება საქართველოს პენიტენციურ სისტემაში“ - ფარგლებში გაიმართა.
ფსიქოლოგები და სოციალური მუშაკები რეაბილიტაცია-რესოციალიზაციის პროცესში
იუსტიციის სამინისტრო პრობაციისა და პენიტენციური სისტემების საერთაშორისო სტანდარტების შესაბამისად განვითარების საკითხებზე მუშაობას განაგრძობს. კანონთან კონფლიქტში მყოფი პირების რეაბილიტაცია-რესოციალიზაციის პროცესში ჩართული ფსიქოლოგებისა და სოციალური მუშაკების პროფესიული განვითარების ხელშეწყობის მიზნით კონფერენცია გაიხსნა. ღონისძიების მონაწილეები ორი დღის განმავლობაში იმსჯელებენ ფსიქოლოგებისა და სოციალური მუშაკების მიერ შემთხვევის მართვის შესახებ, ერთმანეთს გაუზიარებენ გამოცდილებას და განიხილავენ მულტისექტორული თანამშრომლობის კონკრეტულ გზებს, რაც პენიტენციური და დანაშაულის პრევენციის სისტემებს უფრო ეფექტიანს გახდის. კონფერენციის მონაწილეებს მისასალმებელი სიტყვით მიმართეს იუსტიციის მინისტრის მოადგილე ბუბა ლომუაშვილმა და საქართველოში ევროპის საბჭოს ოფისის ხელმძღვანელმა ნატალია ვუტოვამ. კონფერენციაზე აღინიშნა, რომ პრობაციისა და პენიტენციური სისტემების შემდგომი განვითარება საუკეთესო ევროპული და საერთაშორისო სტანდარტების შესაბამისად საქართველოს იუსტიციის სამინისტროს სტრატეგიული პრიორიტეტია და ის მნიშვნელოვნად არის დამოკიდებული სოციალური მუშაკებისა და ფსიქოლოგების პროფესიონალურ საქმიანობაზე; შეფასდა სისტემებში ბოლო 10 წლის მანძილზე მიღწეული პროგრესი. ღონისძიება იუსტიციის სამინისტროს, დანაშაულის პრევენციისა და არასაპატიმრო სასჯელთა აღსრულებისა და პრობაციის ეროვნულ სააგენტოსა და ევროპის საბჭოს ოფისის ორგანიზებით გაიმართა პროექტის - „ჯანდაცვის უზრუნველყოფის გაუმჯობესება საქართველოს პენიტენციურ სისტემაში“ - ფარგლებში. კონფერენციას ესწრებოდნენ აღმასრულებელი ხელისუფლების წევრები; დანაშაულის პრევენციისა და არასაპატიმრო სასჯელთა აღსრულებისა და პრობაციის ეროვნული სააგენტოს, სპეციალური პენიტენციური სამსახურის, საქართველოში ევროპის საბჭოს ოფისის წარმომადგენლები და მოწვეული სტუმრები