ა(ა)იპ ‘’ამბრელასთან" შეთანხმება გაფორმდა
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ორგანიზებით, უწყების ახალგაზრდებთან მომუშავე სპეციალისტებისთვის არაფორმალური საგანმანათლებლო ხასიათის პროექტები განხორციელდება. კერძოდ, სპეციალურ აქტივობებში ჩართვით, ხელი შეეწყობა მოხალისეობის შესახებ ცნობიერების ამაღლებას, უზრუნველყოფილი იქნება ამ მიმართულებით არსებული გამოცდილების გაზიარება. სპეციალისტები შეძლებენ, ჩაერთონ საერთაშორისო და ადგილობრივ საგანმანათლებლო პროექტებში. პროექტი ააიპ “ამბრელას” მხარდაჭერით განხორციელდება. შეთანხმებას სსიპ-დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ და ააიპ ‘’ამბრელას’’ ხელმძღვანელმა სლავა მეჟდოიანმა მოაწერეს ხელი. მსგავსი პროექტები სააგენტოს მიერ, ბენეფიციარების რესოციალიზაციის ხელშეწყობისკენ მიმართული ღონისძიებების ეფექტიანად აღსრულებას ისახავს მიზნად.
აითი აკადემია სტეპთან თანამშრომლობა ფართოვდება
ბენეფიციართა რესოციალიზაციის ხელშეწყობის მიზნით, მათი ინფორმაციულ ტექნოლოგიებში მომზადების შესაძლებლობები ფართოვდება. აკადემიის სპეციალისტები სააგენტოს ბენეფიციარებს 2D გრაფიკას, UI/UX დიზაინს, 3D გრაფიკას, ანიმაციას, Frontend ვებ-პროგრამირებას, ინტერიერის დიზაინს, IT მხარდაჭერას და ციფრულ მარკეტინგს შეასწავლიან. აღნიშნულის შესახებ შეთანხმება სააგენტოსა და „აითი აკადემია სტეპს“ შორის გასულ წელს შედგა. ამ დროის განმავლობაში, ინფორმაციულ ტექნოლოგიებში მოსამზადებლად სააგენტომ 50-მდე ბენეფიციარი გადაამისამართა. აღნიშნულის თაობაზე დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსი ლადო ხელაძე „აითი აკადემია სტეპის“ დირექტორ მაკა მახათაძეს შეხვდა. სააგენტოსა და აკადემიას შორის არსებული თანამშროლობა ბენეფიციართა რესოციალიზაციისა და რეაბილიტაციის შესაძლებლობების განვითარებას და მათი დასაქმების ხელშეწყობას ემსახურება.
შეხვედრა რეგიონში არასრულწლოვანთა საკითხებზე მომუშავე უწყებებთან
არასრულწლოვანთა რეფერირების ცენტრის წარმომადგენლები რეგიონში არასრულწლოვანთა საკითხებზე მომუშავე სამთავრობო და არასამთავრობო სექტორს შეხვდნენ. შეხვედრის მიზანი არასრულწლოვანთა რეფერირების ცენტრის საქმიანობის უკეთ გაცნობა და უწყებებს შორის კოორდინირებული მუშაობის ხელშეწყობა იყო. არასრულწლოვანთა რეფერირების ცენტრის ოფისები თბილისსა და ქუთაისში ფუნქციონირებს. უახლოეს მომავალში კი თელავში გაიხსნება. რეგიონული ოფისების გახსნა ცენტრის ბენეფიციარებისთვის სერვისების სრულყოფილად მიწოდებას უზრუნველყოფს.
არასრულწლოვანი ბენეფიციარები გამწვანების აქციაში ჩაერთნენ
არასრულწლოვანთა რეფერირების ცენტრის ბენეფიციარები გამწვანების აქციაში ჩაერთნენ. მოზარდებმა ვარკეთილი 3-ის I მიკრორაიონში, საქართველოს ერთიანობისთვის მებრძოლთა ქუჩაზე მდებარე ე.წ. სკეიდპარკის ტერიტორიაზე ხეები დარგეს. კამპანია „გაამწვანე სამგორის“ ფარგლებში, ამ დროისთვის, ასი ათასზე მეტი ხე-მცენარეა დარგული.
შპს „წისქვილი ჯგუფთან“ შეთანხმება გაფორმდა
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოს არასრულწლოვანთა რეფერირების ცენტრის ბენეფიციარებისთვის შპს „წისქვილი ჯგუფი“ პროდუქციას უსასყიდლოდ გადასცემს. აღნიშნულთან დაკავშირებით, შეთანხმება გაფორმდა. დოკუმენტს ხელი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ და შპს „წისქვილი ჯგუფის“ აღმასრულებელმა დირექტორმა გიორგი შველიძემ მოაწერეს. კომპანია მის მიერ წარმოებულ სხვადასხვა სახეობისა და რაოდენობის პროდუქტს, სააგენტოს ბენეფიციართა საჭიროების დაკმაყოფილების მიზნით, პერმანენტულად, უსასყიდლოდ, ქველმოქმედების სახით გადასცემს.
სოციალური მუშაკების პროფესიული დღე აღინიშნა
იუსტიციის მინისტრმა სოციალურ მუშაკებს პროფესიული დღე მიულოცა რატი ბრეგაძემ მათ საზოგადოების უსაფრთხოებისთვის გაწეული შრომისთვის მადლობა გადაუხადა და წარმატებული თანამშრომლები დააჯილდოვა. დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ საზოგადოების უსაფრთხოების უზრუნველყოფის განმტკიცების პროცესში სოციალური მუშაობის როლი გამოჰყო სოციალური მუშაკები დანაშაულის პრევენციისა და პრობაციის სფეროში, პენიტენციურ და აღსრულების სისტემებში, კომპლექსურ და საპასუხისმგებლო საქმიანობას ეწევიან. ისინი აქტიურად არიან ჩართული რეაბილიტაცია-რესოციალიზაციის პროგრამებსა და ღონისძიებებში; მსჯავრდებულების, განრიდებული პირების, პრობაციონერებისა და ყოფილი პატიმრების რეაბილიტაცია-რესოციალიზაციის პროცესში, მათი ქცევის პოზიტიური ცვლილების და საზოგადოებაში რეინტეგრაცის მიმართულებით; არასრულწლოვანთა რეფერირების ცენტრის ბენეფიციარებთან მუშაობაში. სოციალური მუშაკების ჩართულობით აღსრულების პროცესში ხელი ეწყობა გადაწყვეტილებათა ნებაყოფლობით შესრულებას და დავების შეთანხმებით დასრულებას. სოციალურ მუშაკთა პროფესიული დღე მსოფლიოში აღინიშნება და საზოგადოების კეთილდღეობისთვის სოციალური სერვისების შესახებ ცნობიერების ამაღლებას, სოციალური სამართლიანობის და ადამიანის უფლებების დაცვას ისახავს მიზნად.
არასრულწლოვანი ბენეფიციარები კერამიკის სტუდიაში
არასრულწლოვანთა რეფერირების ცენტრი ბენეფიციარების რეაბილიტაციისა და რესოციალიზაციის მიზნით, საგანმანათლებლო პროექტებს განაგრძობს. მოზარდები კერამიკის სტუდიაში, თიხაზე მუშაობის პროცესში ჩაერთნენ. არასრულწლოვნებმა საყოფაცხოვრებო ნივთები და დეკორატიული მასალები შექმნეს; მიიღეს ინფორმაცია თიხასთან მუშაობის სპეციფიკაზე. მსგავსი აქტივობები მოზარდებისთვის ინტერესის ახალი სფეროს გამოკვეთასა და სამომავლოდ, პროფესიული არჩევანის გაკეთებაში ხელშეწყობას ისახავს მიზნად. დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს არასრულწლოვანთა რეფერირების ცენტრის პროექტები მოზარდების რეაბილიტაცია-რესოციალიზაციას ემსახურება.
მსჯავრდებულის გათავისუფლებისთვის მოსამზადებელ სტრატეგიაზე მუშაობა მიმდინარეობს
სახელმწიფო მსჯავრდებულის გათავისუფლებისთვის მოსამზადებელ სტრატეგიაზე მუშაობს. დოკუმენტი, ყველა ჩართული უწყების მონაწილეობით, თავისუფლებააღკვეთილი პირის გათავისუფლების მომზადების პროცესში მხარდაჭერას ითვალისწინებს. პენიტენციური დაწესებულების დატოვებიდან პირველი წელი კრიტიკულ პერიოდად მიიჩნევა, შესაბამისად, უმნიშვნელოვანესია, ყოფილმა მსჯავრდებულმა გათავისუფლების შემდგომ საზოგადოებაში რე-ინტეგრაციისთვის უწყვეტი მხარდაჭერა მიიღოს. დოკუმენტი, სამუშაო შეხვედრის ფორმატში, იუსტიციის სამინისტროს მენეჯმენტს წარედგინა. სახელმწიფოს გათავისუფლებისთვის მომზადებისა და გარდამავალი მენეჯმენტის პოლიტიკა მსჯავრდებულთა და ყოფილ პატიმართა საზოგადოებაში რეინტეგრაციის ხელშეწყობასა და უწყებათაშორისი თანამშრომლობით, განმეორებითი დანაშაულის პრევენციას ისახავს მიზნად. დოკუმენტზე იუსტიციის სამინისტრო, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტო, სპეციალური პენიტენციური სამსახური და მსჯავრდებულთა პროფესიული მომზადებისა და გადამზადების ცენტრი მუშაობს. პროცესი აშშ-ის საელჩოს ანტინარკოტიკულ და სამართალდამცავ ორგანოებთან თანამშრომლობის ბიუროს (INL) მხარდაჭერით ხორციელდება.
შეხვედრა ევროპის საბჭოს წარმომადგენლებთან
ევროპის საბჭოს წარმომადგენლებმა დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოს მენეჯმენტთან აღდგენითი მართლმსაჯულების განვითარების და სამომავლო თანამშრომლობის პერსპექტივები განიხილეს. ევროპის საბჭოს ადამიანის უფლებებისა და კანონის უზენაესობის დირექტორატის თანამშრომლობის პროგრამების განყოფილების საქართველოსა და აზერბაიჯანის სამმართველოს ხელმძღვანელი მაჰირ მუშტეიდზადა სააგენტოს უფროსის მოადგილისა და სტრუქტურული ერთეულების ხელმძღვანელებისგან საქართველოში აღდგენითი მართლმსაჯულების მიღწევებს გაეცნო. შეხვედრაზე ევროპის საბჭოს მიერ დაფინანსებული პროექტით - „დავის გადაწყვეტის ალტერნატიული მექანიზმების ხელშეწყობა საქართველოში” - გათვალისწინებული აქტივობები განიხილეს. ასევე, შეთანხმდნენ თანამშრომლობის კონკრეტულ მიმართულებებზე.