დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულმა სააგენტომ არასრულწლოვანი ბენეფიციარებისთვის საახალწლო ღონისძიება გამართა

დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულმა სააგენტომ არასრულწლოვანი ბენეფიციარებისთვის საახალწლო ღონისძიება გამართა. ღონისძიებაზე არასრულწლოვნების მიერ „მობილური ფოტოგრაფიის“ კურსის დასრულების შემდეგ გადაღებული ფოტოებისა და ხელნაკეთი ნივთების გამოფენა მოეწყო; გაიმართა ანიმაციური ვიდეორგოლის პრეზენტაცია, რომელიც მოზარდებმა რეჟისორ არჩილ კუხიანიძის დახმარებით შექმნეს. არასრულწლოვნებსა და პარტნიორი ორგანიზაციების წარმომადგენლებს ახალი წელი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოადგილემ ერეკლე ჭანტურიამ მიულოცა, თანამშრომლობისათვის მადლობა გადაუხადა და სიმბოლური საჩუქრები გადასცა. ღონისძიების ბოლოს არასრულწლოვანთა რეფერირების ცენტრის საქმიანობის შესახებ ვიდეორგოლის ჩვენება გაიმართა. შეხვედრას ეროვნულ არქივის საგამოფენო სივრცემ უმასპინძლა.

გორში, საჩხერესა და ხობში საერთაშორისო სტანდარტების შესაბამისი მედიაციის სივრცეები გაიხსნა

გორში, საჩხერესა და ხობში საერთაშორისო სტანდარტების შესაბამისი მედიაციის სივრცეები გაიხსნა. ადგილზე მედიაციის პროცესის საჭიროებები სრულად არის გათვალისწინებული. მხარეებისთვის უზრუნველყოფილია მოლაპარაკების წარმოების ყველა პირობა. სათანადოდ აღჭურვილ სივრცეში მედიატორებს დაკისრებული მოვალეობის შესრულება გაუმარტივდებათ. ახალი ოფისები იუსტიციის მინისტრის მოადგილე ბუბა ლომუაშვილმა, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა ლადო ხელაძემ და შიდა ქართლის სახლემწიფო რწმუნებულმა მიხეილ შაყულაშვილმა გახსნეს. მედიაცია დამზარალებელსა და დაზარალებულს შორის არსებული კონფლიქტის ამოწურვას ემსახურება. ის აღდგენითი მართლმსაჯულების პრინციპებს ეყრდნობა და ორიენტირებულია დანაშაულის შემხებლობაში მყოფი ყველა პირის ჩართულობაზე, მათი საჭიროებების იდენტიფიცირებასა და საჭიროებების დაკმაყოფილებაზე. მედიაციის სივრცეები თბილისში, ქუთაისში, ხაშურში, ოზურგეთში, ახალქალაქში, სენაკში, ბათუმსა და დღეიდან, უკვე გორში, საჩხერესა და ხობში მოქმედებს; უახლოეს პერიოდში კი, დედოფლისწყაროსა და დმანისში, იქნება ხელმისაწვდომი. დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსი გორში პრობაციის ბიუროში, თანამშრომლებსაც გაესაუბრა, სისტემაში მიმდინარე წლის განმავლობაში დაგეგმილი სიახლეები გააცნო და მათ საჭიროებებზე მიიღო ინფორმაცია.

მედიაციის III ინტერდისციპლინურ ფორუმზე „მედიაცია საქართველოში - გამოწვევები და პერსპექტივა“ - აღდგენითი მართლმსაჯულების საკითხები განიხილეს

მედიაციის III ინტერდისციპლინურ ფორუმზე „მედიაცია საქართველოში - გამოწვევები და პერსპექტივა“ - აღდგენითი მართლმსაჯულების საკითხები განიხილეს. ფორუმზე ყურადღება დაეთმო სააგენტოს მიერ საქართველოში აღდგენითი მართლმსაჯულების განვითარებისთვის განხორციელებულ წარმატებულ ინიციატივებს. კერძოდ, მედიატორთა რეესტრში ჩარიცხული მედიატორების გადამზადებასა და შემდგომ, მათ სააგენტოში დასაქმებას. ასევე, საერთაშორისო სტანდარტების შესაბამისი მედიაციის რეგიონული სივრცეების მოწყობასა და აღდგენითი მართლმსაჯულების კანონპროექტის შემუშავებას. ფორუმის ორგანიზატორი იყო საქართველოს მედიატორთა ასოციაცია. ღონისძიებაში დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსმა, ლადო ხელაძემ მიიღო მონაწილეობა. III ინტერდისციპლინურ ფორუმში ასევე მონაწილეობდნენ საქართველოს ნოტარიუსთა პალატის გამგეობის, საქართველოს შრომის, ჯანმრთელობისა და სოციალური დაცვის სამინისტროს, საქართველოს მედიატორთა ასოციაციის, პროფესიული კავშირების გაერთიანების, დამსაქმებელთა ასოციაციის, პროფესიული კავშირების გაერთიანების, პროკურატურის, განრიდებისა და მედიაციის დეპარტამენტის და ევროკავშირისა და გაეროს განვითარების პროგრამის ერთბლივი პროექტის წარმომადგენლები

საერთაშორისო კონფერენცია - „სოციალური მუშაკებისა და ფსიქოლოგების როლი სოციალური პოლიტიკის განხორციელებისა და მხარდაჭერის პროცესში“

იუსტიციის სამინისტრო დანაშაულის პრევენციის, პრობაციისა და პენიტენციური სისტემების საერთაშორისო სტანდარტების შესაბამისად განვითარების საკითხებზე მუშაობას განაგრძობს. სოციალური მუშაკებისა და ფსიქოლოგების პროფესიული განვითარების ხელშეწყობის მიზნით საერთაშორისო კონფერენცია - „სოციალური მუშაკებისა და ფსიქოლოგების როლი სოციალური პოლიტიკის განხორციელებისა და მხარდაჭერის პროცესში“ გაიხსნა. ორდღიანი ღონისძიება შესაბამის სფეროში აქტუალური საკითხებისა და გამოწვევების განხილვას, საუკეთესო ადგილობრივი და საერთაშორისო პრაქტიკის გაზიარებას, პროფესიული განვითარების ხელშეწყობას, არსებული მომსახურებების და რესურსების შესახებ ინფორმაციის გაცვლასა და მულტისექტორული თანამშრომლობის გაძლიერებას ემსახურება. საერთაშორისო კონფერენცია იუსტიციის მინისტრის მოადგილე ბუბა ლომუაშვილმა გახსნა. კონფერენციაზე აღინიშნა, რომ პრობაციისა და პენიტენციური სისტემების შემდგომი განვითარება საუკეთესო ევროპული და საერთაშორისო სტანდარტების შესაბამისად საქართველოს იუსტიციის სამინისტროს სტრატეგიული პრიორიტეტია და ის მნიშვნელოვნად არის დამოკიდებული სოციალური მუშაკებისა და ფსიქოლოგების პროფესიონალურ საქმიანობაზე. შეფასდა სისტემებში ბოლო 11 წლის მანძილზე მიღწეული პროგრესი. ღონისძიება იუსტიციის სამინისტროს, დანაშაულის პრევენციისა, არასაპატიმრო სასჯელთა აღსრულებისა და პრობაციის ეროვნულ სააგენტოსა და საქართველოში ევროპის საბჭოს ოფისის ორგანიზებით გაიმართა. კონფერენციას იუსტიციის სამინისტროს, განათლებისა და მეცნიერების სამინისტროს, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს, შინაგან საქმეთა სამინისტროს, თავდაცვის სამინისტროს, ასევე საერთაშორისო ორგანიზაციებისა და აკადემიური სფეროს წარმომადგენლები ესწრებიან.

არასრულწლოვანთა რეფერირების ცენტრის ბენეფიციარები პროექტ - „ერთი დღე სამზარეულოში“ ფარგლებში სარესტორნო ქსელის, წისქვილი ჯგუფის „თეატრის“ სამზარეულოს ესტუმრნენ

დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს არასრულწლოვანთა რეფერირების ცენტრის ბენეფიციარები პროექტ - „ერთი დღე სამზარეულოში“ ფარგლებში სარესტორნო ქსელის, წისქვილი ჯგუფის „თეატრის“ სამზარეულოს ესტუმრნენ. არასრულწლოვნებმა გამოცდილ შეფ-მზარეულთან ერთად კერძების მომზადებისა და გაფორმების პროცესში მიიღეს მონაწილეობა. მსგავსი აქტივობები ბენეფიციარების რეაბილიტაცია-რესოციალიზაციის პროცესის მხარდაჭერას, ცნობიერების ამაღლებასა და პროფესიული ორიენტაციის ხელშეწყობას ისახავს მიზნად, რაც უწყების ძირითადი პრიორიტეტია.

დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს თანამშრომლებმა აშშ-ში აღმასრულებელი ლიდერობის ფორუმში მიიღეს მონაწილეობა

იუსტიციის სამინისტროს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს თანამშრომლებმა აშშ-ში აღმასრულებელი ლიდერობის ფორუმში მიიღეს მონაწილეობა. ღონისძიების მიზანი იყო პოზიტიური ორგანიზაციული ცვლილების წარმართვის და თანამედროვე სასჯელაღსრულების მართვის პრაქტიკის გაზიარება. ფორუმის ფარგლებში, სააგენტოს თანამშრომლები გაეცნენ სტრუქტურული მართვისა და უწყებაში ლიდერის მისიის ხედვისა და მხარდაჭერის შესახებ ამერიკულ გამოცდილებას. ასევე ამერიკული ქოუჩინგის მოდელს, რომელიც ხელს უწყობს ორგანიზაციული კულტურისა და ხედვის სწორად ჩამოყალიბებას. ვიზიტი აშშ-ის საელჩოსა და ანტინარკოტიკული და სამართალდაცვითი პროგრამების საერთაშორისო ბიუროს (INL) მხარდაჭერით განხორციელდა.

დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს პრობაციის ოფიცრები

განრიდებისა და მედიაციის დეპარტამენტის მედიატორებს ევროპის საბჭოს პროექტის - „დავის გადაწყვეტის ალტერნატიული მექანიზმების ხელშეწყობა საქართველოში“ - ფარგლებში ტრენინგი ჩაუტარდათ

იუსტიციის სამინისტროს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტო მედიატორების გადამზადებას აგრძელებს. განრიდებისა და მედიაციის დეპარტამენტის მედიატორებს ევროპის საბჭოს პროექტის - „დავის გადაწყვეტის ალტერნატიული მექანიზმების ხელშეწყობა საქართველოში“ - ფარგლებში ტრენინგი ჩაუტარდათ. სწავლებას მოწვეული ექსპერტი, სისხლის სამართლის მედიატორი პია სლოგსი უძღვებოდა. მან ტრენინგის მონაწილეებს საერთაშორისო პრაქტიკა და გამოცდილება გაუზიარა, ინფორმაცია მიაწოდა აღდგენითი მიდგომის მნიშვნელობაზე, მედიაციის მოსამზადებელ ეტაპებსა და პროცესში წარმოქმნილი დაბრკოლებების გადალახვაზე, ასევე, საქმის წარმოების ფორმალურ მხარეზე, როგორც მედიაციის პროცესის მნიშვნელოვან ნაწილზე. ექსპერტმა ქართველ კოლეგებთან ერთად პრაქტიკული საქმეებიც განიხილა. ტრენინგის მიზანი იყო მედიატორთა კვალიფიკაციის ამაღლების ხელშეწყობის გზით სისხლის სამართლის მედიაციის ხარისხის გაუმჯობესება.

ბათუმში მედიაციის, ყოფილ პატიმართა რეაბილიტაციის სივრცე და არასრულწლოვანთა რეფერირების ცენტრი გაიხსნა

ბათუმში მედიაციის, ყოფილ პატიმართა რეაბილიტაციის სივრცე და არასრულწლოვანთა რეფერირების ცენტრი გაიხსნა. იუსტიციის სამინისტროს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს სერვისებზე ხელმისაწვდომობა იზრდება. ბათუმში მედიაციის, ყოფილ პატიმართა რეაბილიტაციის და არასრულწლოვანთა რეფერირების ცენტრი იუსტიციის მინისტრმა რატი ბრეგაძემ, მოადგილე ბუბა ლომუაშვილმა და სააგენტოს უფროსმა ლადო ხელაძემ გახსნეს. ბათუმში ბენეფიციართა რეაბილიტაციისა და რესოციალიზაციის პროცესის ეფექტური მომსახურებისა და მედიაციის შეხვედრების ჩატარებისთვის ყველა პირობაა შექმნილი და შესაბამისი საჭიროებები სრულად არის გათვალისწინებული. სააგენტოს რეგიონული შესაძლებლობების გაფართოება ხელს უწყობს კანონთან კონფლიქტში მყოფ და რთული ქცევის მქონე 14 წლამდე არასრულწლოვნებს, განრიდება-მედიაციის პროგრამაში ჩართულ პირებს და ყოფილ პატიმრებს, ადგილზე მიიღონ მომსახურებები, რომლებიც მათში დანაშაულის გააზრებას, პროსოციალური უნარების განვითარებასა და საზოგადოებაში სრულფასოვან ინტეგრაციას შეუწყობს ხელს. დანაშაულის პრევენცია და სისხლისსამართლებრივი დევნის ალტერნატიული, არასაპატიმრო ფორმების დანერგვა იუსტიციის სამინისტროს პრიორიტეტული მიმართულებაა.