ქალთა მიმართ ძალადობის წინააღმდეგ ბრძოლის საერთაშორისო დღე
დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულმა სააგენტომ ქალთა მიმართ ძალადობის წინააღმდეგ ბრძოლის საერთაშორისო დღე ბენეფიციარების ნამუშევრების გამოფენით აღნიშნა. უწყების ხელმძღვანელმა პირებმა, ეროვნული არქივის საგამოფენო სივრცეში წარმოდგენილი ქალი ბენეფიციარების ნაკეთობები პარტნიორი ორგანიზაციების წარმომადგენლებთან ერთად დაათვალიერეს. სააგენტოს უფროსის მოადგილემ, ლადო ხელაძემ ბენეფიციარებისთვის სიტყვით მიმართვისას ქალთა გაძლიერებისთვის საერთაშორისო ორგანიზაციებთან პარტნიორობით განხორციელებული პროექტებზე ისაუბრა. ერთ-ერთი ასეთი ინიციატივა პარტნიორზე მოძალადე პირებისთვის ქცევის კორექციის პროგრამაა, რომელშიც უკვე 500-მდე პირი ჩაერთო. ის გაეროს ქალთა ორგანიზაციის UN Women-ის მხარდაჭერით, 2016 წელს დაინერგა. შეხვედრაზე აქცენტი პირობით მსჯავრდებულთა და პირობით ვადაზე ადრე გათავისუფლებულ პირთა საზოგადოებაში ინტეგრაციის ხელშეწყობაზეც გაკეთდა. შეხვედრას გაეროს ქალთა ორგანიზაციის წარმომადგენლის მოადგილე თამარ საბედაშვილი, ორგანიზაცია “ქალი და ბიზნესის“ ხელმძღვანელი ნინო ელიზბარაშვილი და ძალადობისგან დაცვის ეროვნული ქსელის წარმომადგენელი ელენე სამუშია ესწრებოდნენ. ქალ ბენეფიციართა მხარდაჭერისკენ მიმართული ღონისძიება ნარინჯისფერ კვირეულს უკავშირდება, რომელიც ქალთა მიმართ ძალადობის წინააღმდეგ ბრძოლის საერთაშორისო დღეს - 25 ნოემბერს გაიხსნა და 10 დეკემბერს - ადამიანის უფლებათა დაცვის საერთაშორისო დღეს დაიხურება. გლობალური ინიციატივა ქალთა მიმართ ძალადობის პრობლემატიკაზე საზოგადოების ცნობიერების ამაღლებას ემსახურება.
არასრულწლოვანი ბენეფიციარები მეხანძრე-მაშველების საქმიანობას გაეცნენ
არასრულწლოვანთა რეფერირების ცენტრის ბენეფიციარები მეხანძრე-მაშველების საქმიანობას გაეცნენ. ამ მიზნით, ისინი საგანგებო სიტუაციების მართვის სამსახურის განსაკუთრებულ სიტუაციებზე რეაგირების მთავარი სამმართველოს ბაზაზე იმყოფებოდნენ. მოზარდებს ოპერაციების დროს მოქმედებების შესახებ ზოგადი ინფორმაცია უშუალოდ მეხანძრე-მაშველებმა გააცნეს. სახანძრო-სამაშველო ძალების დეპარტამენტის წარმომადგენელი არასრულწლოვნებს სამსახურის სპეციფიკაზე ესაუბრა და სახანძრო ავტო-ცისტერნა დაათვალიერებინა. განსაკუთრებულ სიტუაციებზე რეაგირების მთავარი სამმართველოს თანამშრომლებმა, სპეციალურად მოზარდებისთვის, სამთო კედელზე სავარჯიშოებიც შეასრულეს. თეორიული ინფორმაციის გაცნობის შემდეგ, ინსტრუქტორების უშუალო ზედამხედველობით, არასრულწლოვანთა რეფერირების ცენტრის ბენეფიციარებს აქტივობებში ჩართვის შესაძლებლობაც მიეცათ. მოზარდები შსს-ს საგანგებო სიტუაციების მართვის სამსახურს არასრულწლოვანთა რეფერირების ცენტრის პროექტის ფარგლებში სტუმრობდნენ. პროექტი - „მე გავხდები პროფესიონალი“ - ცენტრის დაარსებიდან ხორციელდება, რომლის ფარგლებშიც, არასრულწლოვნები სხვადასხვა სექტორის ორგანიზაციებს პერიოდულად სტუმრობენ. სამუშაო გარემოში პროფესიის გაცნობა კი, მათ სპეციალობის არჩევაში ეხმარება. არასრულწლოვანთა რეფერირების ცენტრი დანაშაულის პრევენციის არასაპატიმრო სასჯელთა აღსრულებისა და პრობაციის ეროვნული სააგენტოს სტრუქტურული ერთეულია. ცენტრის მიზანს სისხლის სამართლებრივ პასუხისმგებლობის ასაკს მიუღწეველი, კანონთან კონფლიქტში მყოფი და რთული ქცევის მქონე არასრულწლოვნების სოციალიზაცია, რესოციალიზაცია და რეაბილიტაცია წარმოადგენს.
მემორანდუმი „ასოციაცია ჰერა XXI“-თან
სააგენტოს ბენეფიციარებს ჯანმრთელობის საკითხებზე კონსულტაციას „ასოციაცია ჰერა XXI“ გაუწევს. ამასთან დაკავშირებით, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოსა და „ასოციაცია ჰერა XXI“-ს შორის ურთიერთთანამშრომლობის მემორანდუმი გაფორმდა. დოკუმენტს ხელი იუსტიციის მინისტრის მოადგილემ, სააგენტოს უფროსმა, ბუბა ლომუაშვილმა და ასოციაციის აღმასრულებელმა დირექტორმა, ნინო წულეისკირმა მოაწერეს. შეთანხმების მიხედვით, ასოციაციის სპეციალისტები სექსუალური და რეპროდუქციული ჯანმრთელობისა და უფლებების საკითხების მიმართულებით ცნობიერების ამაღლებას უზრუნველყოფენ. ისინი სააგენტოს ბენეფიციარებსა და სოციალურ მუშაკებს საგანმანათლებლო შეხვედრებს ჩაუტარებენ. გაუწევენ როგორც ჯგუფურ, ისე ინდივიდუალურ კონსულტაციებს. ექიმი რეპროდუქტოლოგი სოციალურ მუშაკებს მიმართულების ძირითად ასპექტებს გააცნობს და ცენტრის ბენეფიციარების ფსიქო-სოციალური პორტრეტების შედგენისთვის, კითხვარებს შეიმუშავებს. სერვისით არასრულწლოვანთა რეფერირების ცენტრის 10 ბენეფიციარი ისარგებლებს, ხოლო განრიდებული და არასრულწლოვანი პრობაციონერებისთვის საჭიროებებზე მორგებული გაერთიანებული თემატური საგანმანათლებლო სესია ჩატარდება. თანამშრომლობა სააგენტოს ბენეფიციარების რეაბილიტაციასა და რესოციალიზაციაში ხელშეწყობას ემსახურება. მისი გაგრძელების უზრუნველსაყოფად, სამომავლოდ განსახორციელებელი პროექტები შემუშავდება. „ასოციაცია ჰერა XXI“-ისა და არასრულწლოვანთა რეფერირების ცენტრის თანამშრომლობის შედეგად, ცენტრის ფსიქოლოგი International Planned Parenthood Federation (IPPF)-ის მიერ ორგანიზებულ ტრენინგში მონაწილეობდა. სწავლება სექსუალურად ტრანსაგრესიული ქცევის შეფასებისა და რეაგირების ინოვაციურ მიდგომას ეხებოდა, რომლის დანერგვაც საქართველოში სამომავლოდ იგეგმება.
ყოველწლიური სამუშაო შეხვედრა
დანაშაულის პრევენციის შესაძლებლობების გაძლიერება, არასაპატიმრო სასჯელთა ეფექტური აღსრულება და პრობაციის სფეროში ინოვაციური ტექნოლოგიების დანერგვა - ეს მიმართულებები განიხილეს სააგენტოს ყოველწლიურ სამუშაო შეხვედრაზე. ღონისძიებას იუსტიციის მინისტრის მოადგილე ბუბა ლომუაშვილი უძღვებოდა. მან, უწყების ხელმძღვანელ პირებთან ერთად, სააგენტოში განხორციელებული რეფორმები შეაჯამა და განვითარების სამომავლო გეგმები წარადგინა. გეგმის მიხედვით, ბენეფიციარებისთვის საჭიროებებზე მორგებული სარეაბილიტაციო პროგრამების არეალი გაფართოვდება, საზოგადოებისთვის სასარგებლო შრომის ეფექტური აღსრულების გასაზრდელად, მუნიციპალიტეტებთან თანამშრომლობის მიზნით, მემორანდუმების გაფორმება გაგრძელდება. მედიაციის ინსტიტუტის გაძლიერებისთვის მედიატორები საქართველოს ყველა რეგიონში დასაქმდებიან. გაგრძელდება არასრულწლოვანთა რეფერირების ცენტრის განვითარება. დაგეგმილი საკანონმდებლო ინიციატივის ფარგლებში, შინაპატიმრობის აღსრულებისას უზრუნველყოფილი იქნება დარღვევებზე ეფექტიანი რეაგირება. პრობაციონერთა ელექტრონული კონტროლი და სერვისების უზრუნველყოფა პრობბოქსის საშუალებით განხორციელდება. ამ მიზნით, ინოვაციური ტექნოლოგიური მოწყობილობა მიმდინარე წლის დეკემბრიდან 6 რეგიონის იუსტიციის სახლებში, საზოგადოებრივ ცენტრებსა და მუნიციპალურ შენობებში განთავსდება. მისი საშუალებით, პრობაციონერები, გამოცხადების დაფიქსირებასა და სააგენტოს მიერ შეთავაზებული სერვისებით სარგებლობას, ბიუროებში მისვლის გარეშე შეძლებენ. სააგენტოს მიზნების მისაღწევად, გაძლიერდება ანალიტიკური მიმართულება და განმტკიცდება საერთაშორისო თანამშრომლობის მექანიზმები. შეხვედრა აშშ-ს ანტინარკოტიკული და სამართალდამცავ ორგანოებთან თანამშრომლობის ბიუროს (INL) მხარდაჭერით ჩატარდა. მას ბიუროს სასჯელაღსრულების საკითხებში უფროსი მრჩეველი სკოტ ვიგინსი და დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ხელმძღვანელი პირები ესწრებოდნენ.
შეხვედრა თურქეთის საელჩოს წარმომადგენლებთან
პირობით მსჯავრდებულთა ელექტრონული კონტროლის ნოვატორულ მიდგომებსა და შინაპატიმრობის აღსრულების გამოცდილებას უსაფრთხოებისა და შინაგან საქმეთა საკითხებში თურქეთის საელჩოს მრჩევლები ნეჯმი ინჩე და ნეჯმეთინ აქჩა გაეცნენ. ამ მიზნით, ისინი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოში იმყოფებოდნენ. სააგენტოს სტრუქტურული ერთეულების ხელმძღვანელმა პირებმა, სტუმრებთან ერთად, საქართველოსა და თურქეთში შინაპატიმრობის აღსრულების სპეციფიკა და მასთან დაკავშირებული ელექტრონული ზედამხედველობის შესაძლებლობები განიხილეს. იმსჯელეს პრობაციის სფეროში არსებულ საკანონმდებლო აქტებსა და ინსტრუმენტებზე. საელჩოს წარმომადგენლები პირობით მსჯავრდებულთა ელექტრონული კონტროლისა და სერვისების უზრუნველყოფის ინოვაციურ მოწყობილობას - პრობბოქსს გაეცნენ, რომელიც იუსტიციის სახლებში, საზოგადოებრივ ცენტრებსა და მუნიციპალურ შენობებში მიმდინარე წლის დეკემბრიდან განთავსდება. მხარეებმა კანონთან კონფლიქტში მყოფი და რთული ქცევის მქონე არასრულწლოვანთა, ასევე ყოფილ მსჯავრდებულთა რესოციალიზაციისა და რეაბილიტაციის პროგრამებიც განიხილეს. შეხვედრის დასასრულს, საელჩოს წარმომადგენლებმა, საუკეთესო პრაქტიკის გაზიარების მიზნით, სააგენტოსთან თანამშრომლობის გაღრმავების მზადყოფნა გამოთქვეს.
არასრულწლოვანი ბენეფიციარები კლინიკა "ვეტ-ჰაუსში"
არასრულწლოვანთა რეფერირების ცენტრის ორგანიზებით, ვეტერინარიით დაინტერესებული ბენეფიციარები პროფესიის სპეციფიკას კლინიკა „ვეტ-ჰაუსში“ გაეცნენ. კლინიკის დათვალიერების შემდეგ, მოზარდები ცხოველების სამედიცინო მანიპულაციებს დაესწრნენ და მათი მოვლის პროცესში სპეციალისტის ზედამხედველობით ჩაერთნენ. ვეტერინარის პროფესიის გაცნობის მიზნით, კლინიკაში ვიზიტი ბენეფიციარების ინტერესების გათვალისწინებით დაიგეგმა. შესაბამისად, არასრულწლოვანთა რეფერირების ცენტრი, ვეტერინარულ კლინიკებთან თანამშრომლობის გაძლიერებას გეგმავს. ამ მიზნით, უახლოეს მომავალში პროფილის სხვადასხვა დაწესებულებასთან მემორანდუმები გაფორმდება. თანამშრომლობის მომდევნო ეტაპზე კი, ბენეფიციართა რესოციალიზაცია-რეაბილიტაციის პროცესში, პეტ-თერაპიის მოდელი დაინერგება. ნოვატორული მიდგომა ბენეფიციარების ემოციური სირთულეების დაძლევაში დახმარებას ისახავს მიზნად. ბენეფიციარები ვეტ-კლინიკაში არასრულწლოვანთა რეფერირების ცენტრის პროექტის - „მე გავხდები პროფესიონალი“ - ფარგლებში იმყოფებოდნენ. პროექტი ცენტრის დაარსებიდან ხორციელდება. არასრულწლოვნები პერიოდულად სხვადასხვა სექტორის ორგანიზაციებს სტუმრობენ. სამუშაო გარემოში პროფესიის გაცნობა კი, მათ სპეციალობის არჩევაში ეხმარება.
INL-ის წარმომადგენლები აჭარისა და გურიის პრობაციის რეგიონული ბიუროში
აშშ-ის ანტინარკოტიკული და სამართალდამცავ ორგანოებთან თანამშრომლობის ბიუროს წარმომადგენლები აჭარისა და გურიის პრობაციის რეგიონული ბიუროს სამუშაო პროცესს გაეცნენ. სასჯელაღსრულების საკითხებში უფროს მრჩეველს, სკოტ ვიგინსს ბათუმისა და ოზურგეთის ოფისებში დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოადგილემ, ვლადიმერ ხელაძემ და რეგიონული ბიუროს ხელმძღვანელმა, მამუკა თხილაიშვილმა უმასპინძლა. ბიუროს წარმომადგენლები პრობაციის ოფიცრებსაც შეხვდნენ, მათი მუშაობის სპეციფიკას გაეცნენ და უწყების ხელმძღვანელ პირებთან ერთად, სააგენტოში მიმდინარე რეფორმები განიხილეს. აშშ-ის ანტინარკოტიკული და სამართალდამცავ ორგანოებთან თანამშრომლობის ბიურო სააგენტოსთან, საქართველო-აშშ-ს სტრატეგიული პარტნიორობის ფარგლებში, მრავალი წელია თანამშრომლობს. ამ დროის განმავლობაში, ბიურომ სააგენტოს პერსონალისთვის აშშ-ში სასწავლო ვიზიტები უზრუნველყო და უწყებას სხვადასხვა მომსახურებისთვის საჭირო ტექნიკური აღჭურვილობა, მათ შორის, თითის ანაბეჭდის ამომცნობი მოწყობილობები და ვიდეოპაემნის აპარატურა გადასცა. ბიუროს წარმომადგენლებმა მზადყოფნა გამოთქვეს, გააღრმავონ სააგენტოსთან თანამშრომლობა პერსონალის შესაძლებლობების გაძლიერებისა და პრობაციის სფეროში აშშ-ს გამოცდილების გაზიარების მიმართულებებით.
ტრენინგი ძალადობრივი ქცევის კორექციის კურსის ეფექტიანი განხორციელებისთვის
ძალადობრივი ქცევის კორექციის კურსის ეფექტიანი განხორციელებისთვის პრობაციისა და პენიტენციური სისტემის სპეციალისტები გადამზადდნენ. ფსიქოლოგებმა და სოციალურმა მუშაკებმა ინტენსიური ტრენინგი გაიარეს. მოდული თეორიულ და პრაქტიკულ სწავლებას მოიცავდა. გადამზადება სისტემაში დასაქმებულ სპეციალისტებს ძალადობრივი ქცევის მქონე პირებისთვის ინდივიდუალური და ჯგუფური მომსახურების მიწოდებაში დაეხმარება. ტრენინგი სპეციალისტების საქმიანობის ეფექტიანობას გაზრდის, რაც ძალადობრივი ქცევის შემცირებას შეუწყობს ხელს. ფასილიტატორების გადასამზადებელი კურსის მიმდინარეობას იუსტიციის მინისტრის მოადგილე, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ხელმძღვანელი ბუბა ლომუაშვილი ადგილზე გაეცნო. პარტნიორზე მოძალადე პირებისთვის ქცევის კორექციის პროგრამა გაეროს ქალთა ორგანიზაციის UN Women-ის მხარდაჭერით დაინერგა. „ძალადობრივი დამოკიდებულებისა და ქცევის შეცვლაზე ორიენტირებული სწავლების კურსი“ სხვადასხვა მოდულს აერთიანებს. კურსი ოჯახში გენდერულ ძალადობას, აგრესიის მართვის მეთოდებს, წყვილებს შორის ძალადობრივი, აგრესიული სქესობრივი ქცევის იდენტიფიცირებას, მათი შედეგების გაცნობიერებასა და ემოციების მართვის საკითხებს მოიცავს. ტრენინგი 22 ოქტომბერს გაიხსნა და დღეს დაიხურება.
სამუშაო შეხვედრა აღდგენითი მართლმსაჯულების საკითხებზე
პროექტი „მედიატორი ყველა მუნიციპალიტეტში“ - აღდგენითი მართლმსაჯულების განვითარების ახალი ეტაპი დაიწყო. ინიციატივა სისხლის სამართლის სისტემაში მედიაციას კიდევ უფრო ხელმისაწვდომს გახდის. ამისთვის, მედიატორები საქართველოს ყველა მუნიციპალიტეტში დასაქმდებიან და მათი საქმიანობისთვის საჭირო ინფრასტრუქტურა ყველა დონეზე იქნება უზრუნველყოფილი. აღდგენითი მართლმსაჯულებისა და მედიაციის ინსტიტუტის განვითარება იუსტიციის სამინისტროს პრიორიტეტულ მიმართულებას წარმოადგენს და უწყების განვითარების 10 წლიან სამოქმედო გეგმაშია ასახული. ამ ცვლილებების, აღდგენითი მართლმსაჯულების მიმართულებით არსებული გამოწვევებისა და საქმიანობის შედეგების გაცნობის მიზნით, სამუშაო შეხვედრა გაიმართა. მედიატორებმა ერთმანეთს გამოცდილება გაუზიარეს. იუსტიციის მინისტრის მოადგილემ, დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ხელმძღვანელმა, ბუბა ლომუაშვილმა, ტრენინგის მონაწილეებს აღდგენითი მართლმსაჯულების ინსტიტუციური განვითარების ხედვა გააცნო. აღდგენითი მართლმსაჯულება დანაშაულთან დაკავშირებული მხარეების ინტერესებს ითვალისწინებს და მათი აქტიური ჩართულობით კონფლიქტის მოგვარების ხელშეწყობაზეა ორიენტირებული. მისი რეფორმა პარტნიორ უწყებებთან ერთად, გაეროს ბავშვთა ფონდისა და ევროკავშირის მხარდაჭერით ხორციელდება. შეხვედრა გაეროს ბავშვთა ფონდის ხელშეწყობით ჩატარდა და მას ორგანიზაციის ბავშვთა დაცვის პროგრამების ხელმძღვანელი თეონა კუჭავა ესწრებოდა.